Gaž sy pśisamem 40 lět pla serbskego radija źěłał, ga sy wjele dožywił a nazgónił – toś móžoš wjele wulicowaś. A rowno to cyni znata a woblubowana serbska reportarka Jutta Kaiserowa we swójich knigłach. Lětźasetki ducy w domowni jo woglědała do wjele jsow a powědała z wjele luźimi. Tak pśed­staja na pśikład Bukow, Pódgólu a Zakaznju, ludowu awtorku Martu Bělkowu w Brjazynje, wušywarja serbskeje drastwy Joachima Lindnera w Kósobuzu a lutki-źěłaśerki w Hochoskej góli. Z mócu jeje słow móžomy z Błośańskeju gustu jěś, do sekretariata Domowiny pósłuchaś, kóńc wójny w Hochozy a pówójnske wuwiśe rolnikarstwa w našych stronach sobu dožywjaś. A nic naslědku wulicujo Jutta Kaiserowa wó njewšednem a žurnem źěle serbskich rozgłosownikow, ako su samo swěźenje a wuběźo­wanja organizěrowali a pśedewšym serbsku rěc z pomocu wjele drugich woplěwali.

Jutta Kaiserowa, teke: Juta Kaiserowa a Juta Kajzerowa, nim. Jutta Kaiser (* 1940) jo dolnoserbska žurnalistka, reportarka, spisowaśelka, publicistka a kulturna procowarka, kótaraž dłujke lěta jo źěłała pla serbskego radija. Wóna bydli w Górach.

W serbskej redakciji radija DDR w Chóśebuzu Jutta Kaiserowa jo chopiła źěłaś w 1962, a wóstała tam až do lěta 2000.

W 1977 Jutta Kaiserowa jo dostała cesne znamuško Domowiny, a w 2010 myto Domowiny.